Banka Qendrore Evropiane uli me një çerek pikë përqindjeje normën bazë të interesit duke e zbritur atë në 3.5 për qind në përgjigje të rënies së inflacionit në Eurozonë dhe shenjave që ekonomia e bllokut rrezikon të ndalet.
Vendimi i së enjtes për të ulur normën bazë të depozitave të BQE-së, për herë të dytë këtë vit, vjen pasi Rezerva Federale e SHBA pritet të fillojë të ulë kostot e huamarrjes javën e ardhshme.
Bankat kryesore qendrore kanë filluar të ulin normat në përgjigje të indikacioneve se rritja më e madhe e inflacionit në një gjeneratë tashmë është zbehur. Disa analistë mendojnë se BQE ka të ngjarë të ulë përsëri normat në të dyja mbledhjet e saj të mbetura këtë vit.
Presidentja e BQE-së Christine Lagarde tha se masa e së enjtes ishte “vendosur unanimisht” – ndryshe nga shkurtimi i mëparshëm në qershor, kur kreu i bankës qendrore të Austrisë Robert Holzmann kundërshtoi.
Duke iu referuar objektivit të BQE-së për inflacionin prej 2 për qind, Lagarde tha se të dhënat e fundit “na inkurajojnë në besimin se po shkojmë drejt objektivit tonë”.
Inflacioni i Eurozonës u ngadalësua në gusht në nivelin më të ulët të tre viteve prej 2.2 për qind, nga 2.6 për qind në korrik. Rënia e prodhimit industrial në Gjermani dhe Itali ka ngritur gjithashtu shqetësime se ekonomia e Eurozonës po ngadalësohet pas një periudhe të shkurtër rritjeje në fillim të këtij viti.
“Presionet e kostos së punës po zbuten dhe fitimet po zbutin pjesërisht ndikimin e pagave më të larta në inflacion,” tha BQE të enjten. “Kushtet e financimit mbeten kufizuese dhe aktiviteti ekonomik është ende i ndrydhur, duke reflektuar konsumin dhe investimet e dobëta private.”
Në projeksionet e reja tremujore, BQE vlerësoi një rritje prej 0.8 për qind këtë vit – pak më pak se parashikimi i qershorit prej 0.9 për qind. Në mënyrë të ngjashme uli vlerësimin e saj për vitin 2025 nga 1.4 për qind në 1.3 për qind, duke përmendur “një kontribut më të dobët nga kërkesa e brendshme gjatë tremujorëve të ardhshëm”.
Banka qendrore e mbajti parashikimin e inflacionit për këtë vit në 2.5 për qind dhe për vitin e ardhshëm në 2.2 për qind.
