Në Shqipëri, shërbimet turistike kushtojnë deri në 248% më pak se në vendpushimet bregdetare të Italisë. Përfundimi ka dalë nga një raport i Consumerismo No Profit, një organizatë që mbron të drejtat e konsumatorëve në Itali. Përmes një raporti të posaccëm CNP ka krahasuar çmimet dhe tarifat e destinacioneve kryesore bregdetare shqiptare dhe atyre italiane.
“Për të fjetur 7 netë në një nga resortet bregdetare të Shqipërisë, nga data 21 deri më 28 gusht në një dhomë dyshe, kostoja minimale fillon nga 175 euro në Vlorë deri në 420 euro në Qeparo.
Nëse zgjidhni struktura ekskluzive apo luksoze në Vlorë, kostoja maksimale arrin në 5653 euro, ndërkohë në destinacionet e tjera shqiptare shkon në 2300 euro”, shkruan agjensia e lajmeve Ansa, duke iu referuar raportit.
Por një javë qëndrimi në hotelet italiane fillon nga një minimum prej 564 euro në Milano Marittima, por mund të arrijë mbi 17 mijë euro në resortet luksoze.
“Ambientet e plazheve në Itali kushtojnë mesatarisht 162% më shumë se brigjet shqiptare”, vijon artikulli.
Sipas të dhënave një vakt i plotë me bazë peshku në Shqipëri kushton mesatarisht midis 20 dhe 25 euro për person, kundrejt 45 deri në 65 euro në Itali.
“Sigurisht që nuk është rastësi që ka një rënie prej 30% të pranisë së bashkatdhetarëve në resortet kryesore bregdetare të vendit tonë, ndërkohë që plazhet e Shqipërisë, Kroacisë dhe Spanjës janë pushtuar nga turistët italianë”- komenton presidenti i CNP, Luigi Gabriel.
