Fabula e mbretit lakuriq është e lashtë, por nuk del asnjëherë nga moda. Madje në Shqiëri përsëritet me frekuencë të rregullt. Kryeministri Edi Rama ndau këtë të mërkurë çertifikatat e rezidencës për kompanitë që do të ushtrojnë aktivitet në parkun teknologjik dhe shkenceor Durana Tech Park.
“Ajo që është surprizë e bukur për ne në interesimet për t’u bërë pjesë e shoqërisë dixhitale të Durana Tech Park, nuk është thjesht numri i kompanive të huaja apo diversiteti i hartës nga SHBA, Franca, Gjermani e deri në Azi, por është aspekti tjetër ai që na bën më shumë përshtypje që ka interes nga institucione akademike, me reputacion në Evropë. Ka filluar procesi për 3 universitete të mirënjohura italiane, dhe ka interes edhe nga të tjera,” tha kreu i qeverisë në eventin e posaçëm.
Interes ka- thotë kryeministri. Por park nuk ka- thonë faktet. Sepse parku nuk ka filluar fare të ndërtohet. Madje, Durana nuk ka as projekt arkitektonik. Por kryeministri vazhdon i bindur se parku që nuk ekziston do të jetë një sukses i madh.
“Durana Tech Park merr jetë dhe kalon nga plani dhe legjislacioni në letër, në realitetin e një numri jo të vogël kompanish që kanë shprehur interesin dhe që nga sot marrin dhe certifikatën e anëtarit të kësaj shoqërie të re digjitale, ku qëllimi ynë kryesor nuk është që të sjellim sa më shumë kompani të huaja, por qëllimi ynë kryesor është që të angazhojmë sa më shumë talente shqiptare. Sot ky park, faktikisht, çon përpara një revolucion digjital që do të vazhdojë hap pas hapi me shumë intensitet.”
Dhe parku që nuk është do të krijojë me mijëra vende pune dhe aktivitet të madh ekonomik.
“Synojmë që të arrijmë shumë shpejt, mbi 5000 mundësi për punë, për ekspertet e teknologjisë dhe profesionistët e rinj, që do të thotë me paga shumë të larta, shumë më të larta se pagat tona, që të jemi shumë të qartë. Synojmë që të rrisim eksportet dhe të ardhurat tona me afërsisht 3.5 miliardë euro brenda dy dekadave vetëm nga kjo iniciativë, gjë që e kemi studiuar dhe e kemi konfirmuar së bashku me partneret tanë francezë në studimin e përgjithshëm. Synojmë që po ashtu të ardhurat në buxhetin e shtetit gjatë periudhës që po flas vetëm nga kjo iniciativë të jenë mbi gjysmë miliard euro, që është diçka shumë domethënëse.”
Ministri i Ekonomisë, Kulturës dhe Inovacionit, Blendi gonxhja, theksoi se Shqipëria bëhet një mundësi e artë për ekonominë se së ardhmes.
“Është sot një realitet konkret që bëhet i mundur valë besimit ndaj investitorëve seriozë. Shqipëria bëhet kështu, një mundësi e artë për ekonominë e së ardhmes, që nuk është vetëm ekonomia shqiptare,” tha Gonxhja.
Fushata elektorale i ka ndezur motorrët. Dhe gjatë kësaj kohe mbreti do të dalë shpesh lakuriq.
