Një situatë e vështirë është krijuar në rrugët nacionale të vendit tonë si pasojë e reshjeve të dendura të shiut. Në Rrugën e Arbrit ka pasur vështirësi në qarkullimin e automjeteve, pasi në fshatin Shkallë të Xibrit, balta ka mbuluar asfaltin.
Rënia e baltës është në mënyrë të vazhdueshme, edhe pse është e pastruar nga makineritë e kompanisë që ndërton këtë rrugë. Ujërat nëntokësore bëjnë që balta të zbresë nga shpati i malit, te duket si një “llavë vullkani”. Prania baltës në këtë segment ka kthyer rrugën në një pengesë për qarkullimin e rregullt të automjeteve që udhëtojnë në drejtim të Tiranës dhe Qarkut Dibër.
Drejtuesit e mjeteve shprehen se ky nuk është problemi i vetëm në këtë rrugë, edhe bypass-i i Murrizit është prekur, me prani të gropave dhe dëmtim të asfaltit anash rrugës. Ata kërkojnë ndërhyrje urgjente në këtë zonë, pasi rrezikojnë jetën teksa kalojnë në të.
