Prokuroria e Posacme duket se ka mbetur brenda në të ashtuquajturën “Dosja Buka” teksa dështoi sërish ta çojë atë në gjykatë për shkak të akuzës së dobët.
Gjykata e Posaçme i ka zgjatur afatin edhe me 3 muaj të tjera SPAK-ut për plotësim hetimesh për dosjen e ashtuquajtura “Buka”. Kjo është hera e dytë, që SPAK dështon ta cojë dosjen në gjyq. Herën e parë, dosja u kthye nga Gjykata, e cila e konsideroi akuzën të paplotë dhe të pambështetur me prova për të qenë e tillë.
Në lidhje me këtë dosje, ish-zv.kryeministri Arben Ahmetaj është marrë i pandehur për veprën penale “Shpërdorim detyre”, duke u akuzuar nga SPAK se i ka shkaktuar një dëm shtetit prej 7 miliardë lekësh. Për këtë çështje SPAK hetoi edhe 7 persona të tjerë përfaqësues të Ministrisë së Financave si dhe biznesmenin Lirim Fezollari, por ndaj këtij të fundit nuk u ngrit asnjë akuzë.
Biznesmeni Lirim Fezollari përfitoi aksionet e “Buka” sh.a., bazuar në një procedurë ankandi të zhvilluar nga ish-ministri Arben Ahmetaj në vitin 2015.
GJKKO ia kishte kthyer fillimisht në muajin dhjetor dosjen SPAK-ut, ku i la 3 muaj kohë për plotësim hetimesh dhe në seancën e sotme pritej që të kalonte për gjykim.
Por, ka qenë vetë prokurori i çështjes, Elvin Gokaj, ai i cili ka bërë kërkesë për zgjatjen e afatit të plotësimit të hetimeve edhe me 3 muaj të tjera, kërkesë e cila u pranua nga GJKKO, duke gjetur dhe dakordësinë e avokatëve të Ahmetajt.
SPAK ka kohë deri më 2 Korrik 2025 për të kryer hetimet e mbetura, kur është caktuar për t’u mbajtur edhe seanca e radhës në Gjykatën e Posaçme.
