Cmimet e kartonit jeshil për qytetarët shqiptarë që udhëtojnë me automjete drejt Malit të Zi do të ketë një kosto vjetore prej 50 euro. Aktualisht çmimi i kartonit jeshil për në Mal të Zi është 15 euro, por me afat vetëm 2 javë. Ndërsa duke filluar nga data 1 Shkurt 2025 qytetarët shqiptarë do të kenë mundësinë të blejnë policën e sigurimit “Kartoni Jeshil” për autoveturat me prim të reduktuar 50 Euro, me afat 1 vjeçar.
Ulja e kostos për këtë rodukt vjen pas rekomandimeve të Komitetit të Përbashkët të Marrëveshjes së Tregtisë së Lirë të Evropës Qendrore (CEFTA), për marrjen e masave të ndërmjetme me qëllim lehtësimin e lëvizjes së lirë të mjeteve, Autoriteti i Mbikëqyrjes Financiare ndërmori një proces konsultimi dhe koordinimi me Byronë Shqiptare të Sigurimit (BSHS) për marrjen e këtij vendimi.
Sipas vendimit të Byrosë së Sigurimeve, qytetarët shqiptarë mund të pajisen me policën e sigurimit “Karton Jeshil” me vlefshmëri 12-mujore nga data e lëshimit, e cila mbulon ekskluzivisht territorin e Malit të Zi. Polica e sigurimit mund të blihet në pikat e kalimit kufitar të Muriqanit, Hanit të Hotit, Grabomit dhe Vermosh.
Kartoni Jeshil është një dokument sigurimi ndërkombëtar, që mbulon përgjegjësitë e drejtuesve të mjeteve me targa shqiptare në rast aksidenti gjatë qarkullimit jashtë territorit të vendit.
