Rreth 65.5 milionë euro rezulton të jetë vlera e aseteve të konfiskuara dhe sekuestruara nga SPAK gjatë vitit 2024. Sipas raportit vjetor të këtij institucioni, vlera e aseteve të konfiskuara kap një shifër prej 36.8 milionë eurosh, ndërsa atyre të sekuestruara rreth 27.7 milionë euro. Kaq është vlera e konfiskimeve dhe sekuestrimeve në kuadër të Ligjit Anti-Mafia, Kodit Penal dhe Aktit Normativ.
Nga totali, rreth 56.2% janë konfiskime dhe 43.8% sekuestrime, pjesa dërrmuese e të cilave janë të proceduara sipas Ligjit Anti-Mafia dhe Kodit Penal.
Vlera e pasurive të konfiskuara dhe sekuestruara nga SPAK kapi shifra rekord në vitin që lamë pas. Të dhënat nga raporti tregojnë që pavarësisht se ka pasur një rënie të numrit të pasurive të konfiskuara në 2024, vlera rezulton më e lartë se në 2023. Konkretisht, vlera e pasurive të konfiskuara është në 938 milionë lekë nga 440 milionë lekë që ishte në vitin 2023, dhe 27 milionë euro nga rreth 18 milionë euro që ishte më parë.
Ndërkohë, edhe vlera e pasurive të sekuestruara ka shënuar një rritje të konsiderueshme. Në 2024 konstatohet një rritje me 47% e vlerës së këtyre pasurive llogaritur me 2023, pra vlera e tyre ka arritur në 2.8 miliardë lekë nga 1.9 miliardë lekë që ishte në vitin pararendës.
Agjencia e Administrimit të Pasurive të Konfiskuara dhe Sekuestruara publikoi së fundmi edhe një katalog mbi numrin e pasurive të konfiskuara që prej vitit 2022. Referuar katalogut, rreth 265 pasuri rezultojnë të jenë konfiskuar në total deri në 2024. Shumica prej tyre janë të përqendruara në Tiranë dhe qytetet bregdetare, ndërsa pjesa më e madhe janë apartamente, godina banimi, apo toka arë, por nuk mungojnë as hotelet, apo njësitë e tjera të biznesit.
Scan
